Опубликовано: 10.02.2021

Дьокуускайдааҕы тыа хаһаайыстыбатын техникумугар төрөөбүт тыл уонна сурук-бичик күнүгэр аналлаах декада ыытылла турар. Студеннар сэргэх, киһи билиитин-көрүүтүн хаҥатар араас тэрээһиннэргэ кытталлар.

Олунньу 9 күнүгэр саха тылыгар олимпиада ыытыллыбыта. Олимпиадаҕа кыттыбыт диэн 24 студент сайаапкалаабыта, үс киһи араас биричиинэнэн тардылланнар үлэлэрин ыыппатылар. «Ааҕыы – билии түннүгэ» онлайн-олимпиада үксүн иккис курс, бары салаалартан студеннар кытыннылар. Бастакы курстан биэс студент хорсуннук киирсэн кытыннылар, үһүс курстан икки студент кыахтарын холонон көрдүлэр.

Олимпиада түмүгүнэн ким миэстэлэспитин туһунан преподаватель Надежда Николаевна Громова иһитиннэрэр.

1 миэстэни уонна кыайыылаах үрдүк аатын Наина Оконешникова (2 лес) 70 баллаах тахсан ылла. Кини төрөөбүт тылын, литературатын үчүгэйдик билэрин чахчы көрдөрдө.

2 миэстэлээх Саина Петухова (3 тпсп) икки баллынан кыайыылаахтан хаалла.

3 миэстэлээх икки студентнар – Эрхаан Игнатьев (2 тех) уонна Виталий Черноградскай (1 лес) иккис призертан эмиэ икки эрэ баллы хотторон таҕыстылар.

Ааспыт сырыыга “Төрөөбүт төрүт тылым – таптыыр сахам тыла барахсан” диэн онлайн-викторина кыайыылааҕа Виталий Черноградскай сахалыы тыл мүөтүн-сүмэтин билэр, чахчы тылы таптыыр эдэр киһи буоларын бу да сырыыга бэлиэтиибит.

Бүгүн, олунньу 10 к. студеннарга бары группаларга төрөөбүт тылга, сурукка-бичиккэ анаммыт кураторскай чаастар ыытыллаллар.

Дьокуускайдааҕы тыа хаһаайыстыбатын техникумун пресс-сулууспата