Опубликовано: 22.11.2021

Бүгүн Саха сирин телевидениетын «Саҥа күн» сарсыардааҥы биэриитигэр Дьокуускайдааҕы тыа хаһаайыстыбатын техникумун үөрэх чааһыгар директоры солбуйааччыта Виктория Афанасьевна Большакова уонна “Саха Өрөспүүбүлүкэтин тыатын хаһаайыстыбатын оҥорон таһаарар тиһигин хааччыйар киин” ГКУ салайааччытын солбуйааччы Дмитрий Анатольевич Филиппов кытыннылар.

Биэрии сүнньүнэн “Агростартап” федеральнай бырайыакка бизнес-былаан оҥостон, көмүскээн хаһаайыстыба тэриниэн баҕалаахтары үөрэтии туһунан кэпсэтии таҕыста. Билигин иккис сылын “Агростартап” диэн федеральнай Саха сиригэр бааһынай хаһаайыстыбаларын тэриниэн баҕалаахтарга саҥа бырайыакка ким баҕалаах кыттыһан, тугунан дьарыктаныан баҕарар хайысхатынан бизнес-бырайыагын ааҕан-суоттаан оҥорон, көмүскээтэҕинэ, граҥҥа тиксэр.

В.А. Большакова:

— Дьокуускайдааҕы тыа хаһаайыстыбатын техникума бырайыак иһинэн үөрэниэн баҕалаах дьону бэлэмнииргэ конкурс тэриллибитигэр кыттаммыт  2021 сыл от ыйыттан үлэлии сылдьабыт. Ол курдук, киин улуустары, илин эҥээрдэри, Бүлүү бөлөҕүнэн, хотугу сытар улуустарга үөрниэн баҕалаахтарга семинардары ыытабыт.

Сэтинньи 22 к. туругунан барыта 11 семинары тэрийдибит. Намҥа миэстэтигэр уонна  КОВИД хаарчахтыыр усулуобуйатынан дистанционнай ньыманан 10 улууска ZOOM нөҥүө 2 күннээх семинардары тэрийэн ыыттыбыт. Кэлэр өттүгэр Горнай, Өлүөхүмэ, Уус-Маайа улуустарыгар үөрэтиэхпит. Онтон биир уопсай семинары ыытабыт. Үөрэтии Контракт усулуобуйатынан сэтинньи 30 күнүгэр түмүктэнэр, — диэн кэпсээтэ.

Семинарга техникум опыттаах преподавателлэрэ Марианна Кимовна Тимофеева, Елена Николаевна Ильина т/х наукатын кандидаттара агрономияҕа, сүөһүнү иитиигэ, Елена Ефимовна Неустроева сири бэйэ бас билиитигэр эбэтэр арендаҕа туһаныыга, Николай Егорович Слепцов техниканы туһаныыга, Прасковья Егоровна Аргунова цифровой технологиялары производствоҕа туһаныыга, Николай Гаврильевич Толстяков үлэҕэ куттала суох буолууга уонна В.А. Большакова ветеринарнай хааччыллыы бастакы ирдэбиллэригэр лекциялары ааҕалларын туһунан эттэ.

• Семинарга барыта 250 киһи үөрэнэрэ былааннанар, онтон 202 киһи үөрэнэн техникум Многофункциональнай киинин сертификатын туттулар, -диэн Виктория Афанасьевна техникум үлэтин сырдатта.

Виктория Афанасьевна техникум ыытар үлэтигэр ордук үчүгэйдик кыттыспыт Амма, Мэҥэ Хаҥалас, Томпо, Хаҥалас, Сунтаар улуустарын дьаһалтатын специалистарыгар махтанна.

Директоры үөрэх чааһыгар солбуйааччы В.А. Большакова кэлэр өттүгэр Дьокуускайдааҕы тыа хаһаайыстыбатын техникума үөрэтэр семинардарын, курстарын туһунан иһиттэххитинэ, суруйтараҥҥын үөрэниҥ диэн ыҥырда.

Дьокуускайдааҕы тыа хаһаайыстыбатын техникумун пресс-сулууспата