Опубликовано: 13.02.2020

Төрөөбүт тыл, сурук-бичик күнүгэр техникумҥа А.С. Пушкин айымньыларын сахалыы тылбаастааһыҥҥа күрэх ыытылынна. Күрэххэ 11 кыттааччы кииристэ,  онтон биэһэ студеннар.

«Бастыҥ тылбаас» анал ааты ылла Екатерина Попова. Екатерина Дмитриевна олус талааннаахтык «Талисман» диэн Александр Пушкин хоһоонун саха омук тилэри өйдүүрүн, ылынарын курдук,  омук тыынын, улуу поэт этэр санаатын толору тиэрдэн тылбаастаабыт.

«Устар ууну сомоҕолуур уус-уран тыл» номинацияны Людмила Максимоваҕа, Светлана Ивановаҕа туттарылынна.

«Тыл – баай» анал аатынан бэлиэтэннилэр Анна Осипова, Саргылана Иванова.

«Этэр тыл эриэккэһэ» номинацияны Красноярскай кыраайтан сылдьар студентка Алиса Эспек ылла. Кини саха  тыла кэмчиэ эйгэтигэр улааттар даҕаны, төрөөбүт сахатын тылын сүмэтин иҥэринэ сылдьарын,  салгыы сайдыан баҕарарын бэлиэтээтибит.

Төрөөбүт тылгытын таптааҥ, баһылааҥ, күннээҕи олоххо киэҥник туттуҥ, оччоҕуна саха омук сириэдийиэ, сайдыаҕа!

Дьокуускайдааҕы тыа хаһаайыстыбатын техникумун пресс-сулууспата