Опубликовано: 04.10.2021

Сааһырбыт дьону бэлиэтиир анал күнүнэн техникум студеннара, преподавателлэрэ үөрэх тэрилтэтигэр үлэлээбит ветераннары эҕэрдэлээн, сэмэй бэлэхтэрин туттардылар.

Маннык эҕэрдэлээх преподаватель Елена Николаевна Ильина техникум биир ытыктанар кырдьаҕас преподавателигэр, выпускницатыгар тиийэн кини махталын, алгыһын устан эһиэхэ тириэрдэр.

• Мин тыа хаһаайыстыбатын техникумун 1943 сыллаахха үөрэнэн бүтэрбитим, сэрии сылларыгар. Быдаан ырааттаҕа дии. Ол тухары биһигини үөрэппит преподавателлэри умнубаппын, сүрдээх үчүгэй дьон этилэрэ. Биһиги туспутугар кыһаллар этилэрэ, сэрии кэмигэр үөрэннэхпит дии. Ыарахан усулуобуйа этэ, ас-таҥас барыта карточнай система. Биһигини, эдэр оҕолору, комсомолецтары барыбытын үлэҕэ ыыталлара колхуостарга, тэрилтэлэргэ. Үс сыл үөрэммиппит да, сайыҥҥы канилкул диэн биир да суох этэ, байыаннай бэриэмэнэн сибээстээн, каникулу боппуттара – мэлдьи үлэлиирбит. Иккис курс кэнниттэн окко арыыга ыыппыттара. Сайыны быһа онно олордубут. Өрөбүлгэ даҕаны ыыппат этилэрэ. Бары сэриини кыайаыҕыҥ, көмөлөһүөҕүҥ диэн күүстээх санаалаах, ким тугу кыайарынан үлэлээбиппит.

Мария Егоровна Саха сирэ бүтүннүүтэ тумус туттар, ытыктыыр киһитэ, бөдөҥ советскай, партийнай уонна судаарыстыбаннай деятелэ, 1941-1944 сылларга Саха АССР Народнай комиссардарын Сэбиэтин бэрэссэдэтэлин солбуйааччыта, 1950-1951 сылларга Миниистирдэр Сэбиэттэрин бэрэссэдээтэлэ, 1951-1965 сылларга Саха сирин обкомун бастакы сэкиритээрин Семен Захарович Борисов кэргэнэ буолар.

Тыа хаһаайыстыбатын техникумугар техникум аныгы дьонугар – үөрэнэр студеннарга, үлэлиир преподавателлэргэ Мария Егоровна ытык алгыһа маннык:

• Бу ыарахан ыарыы турбут кэмигэр барыгытыгар баҕарабын үчүгэй доруобуйаны. Студеннарга үчүгэй үөрэҕи баҕарабын, бары үчүгэй үлэһит буолаарыҥ. Дьоллоох-соргулаах буолуҥ, үчүгэй ыал буолуҥ, кэргэннээх, элбэх оҕолоох-уруулаах, чугас үтүө дьонноох буолуҥ куруутун.
• Бэйэҕит өрөспүүбүлүкэҕитин, оройуоҥҥутун, нэһилиэккитин таптааҥ, ытыктааҥ уонна төрөөбүт дойдубут сайдарын туһугар кыһаллан үлэлиир үчүгэй киһи буолуҥ!
• Преподавателлэр улахан эппиэтинэстээх үлэлээххит. Үлэлиир бириэмэбитигэр онно улаханнык санааҕын уурбат курдук эбиккин – үлэ бэрээдэгинэн сылдьарбыт. Кэлин кырдьан олорон санаатахпына, чахчы, улахан эппиэтинэс эбит оҕону үөрэтэр диэн. Оҕолорго үчүгэйдик сыһыаннаһыахха наада, оҕолору киһи быһыытынан ытыктаан, туохха ыарырҕаталларыгар көмөлөһүөххэ.

Мария Егоровна Борисова быйыл 97-с хаарыгар үктэнэр. Баҕарыаҕыҥ киниэхэ кытаанах доруобуйаны, чөл, этэҥҥэ сылдьарыгар, тапталлаах техникумугар өссө даҕаны кэлэн билсэ турарыгар!

Дьокуускайдааҕы тыа хаһаайыстыбатын техникумун пресс-сулууспата