Опубликовано: 10.02.2022

Олунньу 13 күнүгэр бүттүүн Саха сирэ төрөөбүт тыл уонна сурук-бичик күнүн бэлиэтиир. Бу үтүө тэрээһин тыл, сурук эрэ эйгэтин бэлиэ күнүн кэрдииһиттэн тахсан, норуот сөбүлүүр бырааһынньыга буолбутун билэбит. Өрөспүүбүлүкэҕэ бары тэрилтэлэргэ тылга, сурукка сыһыаннаах араас тэрээһиннэр буолаллар.

Биһиги техникуммутугар норуот сырдык тыыннаах бырааһынньыгар аналлаах анал нэдиэлэ биллэриллибитэ. Саха тылын, суругун-бичигин нэдиэлэтигэр студеннарга анаан преподавателлэр араас үлэни ыыталлар.

Саха тылын үөрэтэр ытыктыыр преподавательбыт Надежда Николаевна Громова иһитиннэрбитинэн, бу нэдиэлэҕэ “Төрөөбүт төрүт тылым – саха тыла барахсан” диэн ааттаах викторинаҕа 3 Зем 9 гр. 42 студент кыттыбыт. Кылаас чааhын куратор Дмитрий Петрович Федоров тэрийбитэ. Былаан быһыытынан бу викторина студеннар  уопсайдарыгар олорор студеннарга ыытыллыбыт.

Викторинаҕа студеннар олус көхтөөхтүк кытыннылар. Ол курдук бэйэлэрин тылга-өскө билиилэринэн, сахалыы литератураны, суругу сөбүлүүллэринэн Виталий Черноградскай (2 лес), Саргылана Алексеева (2 зем-9), Ньургуйаана Андреева (3лес), Нарыйа Павлова (3зио-9), Иван Литвинцев (2 ПСО), Надежда Миронова (2 ПСО), Сайыына Николаева (3 агро), Ньургуйаана Назарова (2 вет), Настя Нарбыкова (3 вет), Саргылана Харитонова (3 техн), Алиса Белолюбская (3 техн), Уйгууна Максимова (3 техн) чорботон бэлиэтээбиттэр.

Төрөөбүт тылга аналлаах иккис бөдөҥ тэрээһининэн Былаан быһыытынан студеннар хас биирдии группаларынан төрөөбүт тыл күнүгэр аналлаах кылаас чаастары ыыталлар.

Ити кылаас чаастарыгар Надежда Николаевна саха норуотун биллиилээх суруйааччыта С.С.Яковлев-Эрилик Эристиин 130 сааһыгар аналлаах видеопрезентацияны көрдөрөр. Итини таһынан “Семен Андреевич Новгородов – саха тылын суругун-бичигин төрүттээччи” диэн дириҥ ис хоһоонноох иитэр-үөрэтэр суолталаах иккис презентацияны студеннар астына, сэҥээрэ көрөллөр.

Оттон бүгүн, олунньу 10 күнүгэр библиотека үлэһитэ, ытыктанар преподаватель Татьяна Николаевна Ильина саха омук историятын, тыл суолтатын, саха суруйааччылара тылы туһаныыларын туһунан үрдүк таһымнаах бэсиэдэни ыыппытын биир даҕаны 1 Агро бөлөҕүн студеннара онлайн туруктан тахсыбакка иһиттилэр. Бу ииллээх студеннары бииргэ куратор Анна Михайловна Филиппова тyмэр, тэрийэр, онон киниэхэ махтанабыт.

Төрөөбүт тылга аналлаах тэрээһиннэр эдэр ыччат уйулҕатын хамсатар, үрдүккэ, кэрэҕэ уһуйар тыыннаах бэсиэдэлэри, лекциялары идэлэрин таптыыр, бэриниилээх преподавателлэр кичэллээхтик бэлэмнэнэн ыыталларыгар дириҥник махтанабыт!

“Дьокуускайдааҕы тыа хаһаайыстыбатын техникума” орто анал идэ үөрэҕин кыһата