Опубликовано: 02.12.2021

Дьокуускайдааҕы тыа хаһаайыстыбатын техникумун тэрийиитинэн ыытыллыбыт семинарга Амма уонна Уус Майа улуустарыгар тыа хаһаайыстыбатын эйгэтигэр үлэлии сылдьар, бэйэлэрин хаһаайыстыбаларын кэҥэтиэн, “Агростартап” бырагырааматыгар киирсиэн баҕарар дьон кытыннылар. Семинар босхо уонна тэйиччиттэн олорон ыытыллыбыт буолан, кыттааччыта да элбэх буолла.

“Амма улууһуттан бу семинарга 33 киһи кытынна. Мантан 19 киһитэ бааһынай хаһаайыстыбатын тэриниэн баҕалаах уонна саҥа тэринэн үлэлээн эрэр дьон. Семинар кыттыылаахтарыгар Саха өрөспүүбүлүкэтин тыатын хаһаайыстыбатын оҥорон таһаарар тиһигин хааччыйар киин уонна тыа хаһаайыстыбатын техникумун исписэлиистэрэ олус туһалаах лекциялары аахтылар. Холобура, бааһынай хаһаайыстыбатын тэринэр киһи Граннарга, субсидияҕа хайдах киирсиэн сөбүн, биисинэс былаана хайдах буолуохтааҕын, сири хайдах бас билиигэ эбэтэр арендаҕа биэрии, бухгалтерскай учуоту оҥоруу уонна да атын тиэмэлэргэ интэриэһинэй иһитиннэриилэр буоллулар. Истибит дьон бары сэргээтилэр уонна инникитин маннык хабааннаах семинардар ыытылла туралларыгар баҕардылар”,- диэн техникум Амма улууһугар оробуочай кадрдары бэлэмниир киинин салайааччыта Марфа Дмитриева билиһиннэрдэ.

Икки күннээх семинар кэмигэр тыа хаһаайыстыбатын управлениетын исписэлиистэрэ, Абаҕа агрооскуолатын үлэһиттэрэ, ветеринарнай управлениеттан бэйэлэрин билиилэрин эмиэ үрдэтэр сыаллаах киирэн иһиттилэр. Үөрэтии төһө да тэйиччиттэн бардар, кыттааччылар бука бары бэчээттэммит көмө матырыйааллары уонна үөрэммиттэрин туоһулуур сертификаттары тутуохтара.

Истибиттэр тэрийээччилэргэ махталларын биллэрдилэр.

“Семинар олус туһалаахтык ааста. Үгүһү биллибит-көрдүбүт. Лектордар да кэпсииллэрэ олус тиийимтиэ, борустуой.

Дьиҥ чахчы тыа хаһаайыстыбатыгар үлэлии сылдьар дьоҥҥо анаммыт семинар диэххэ наада. Онон тэрийээччилэргэ махталбытын этэбит. Биһиги нэһилиэктэн 8 киһи кытынна. Маннык форманан барара үлэлии сылдьар дьоҥҥо, дьиэҕэ да олорооччуларга бэрт табыгастаах эбит. Инникитин да маннык босхо семинардар тэриллэ тураллара буоллар, тыа хаһаайыстыбатын салаатыгар үлэлээччи да элбиэ, билиитэ да хаҥыа этэ”,- диэн Сулҕаччы нэһилиэгин баһылыгын солбуйааччы Василий Неустроев санаатын үллэһиннэ.

“Амма олоҕо” хаһыат, 01.12.2021 15:15